Craving 隨想

Craving 一字，你會點解讀？
話說本人有神經質性Craving一病！即是可以在不同特別的情況或環境下特然二十分之想要得到／食到或用到一件事或物件。
最別出心裁的例子有：
十多年前求學期，半夜三更，大約凌晨四點左右。本人訓醒了，又病發！！今次目標係牡丹樓之豬柳蛋漢堡或早晨全餐！當時位處加拿大多倫多，而當地所有牡丹樓都無二十四小時營業呢回事，所以可以醫我病發嘅解藥就有咗好大嘅限制。由於個人能力有限，我馬上想起要搵人幫拖！最就手又最合理之人選莫過於當時嘅男朋友。我馬上起身向佢求救！佢聽完我無理嘅要求後, 馬上俾咗一個好理性嘅答案過我：就係叫我訓多陣，訓醒再帶我去搵解藥！我個反應係唔得啊，話明係病態咯，點可以訓得番而唔洗立即搵解藥啊！咁點算？！我又訓唔番啦，唯有坐返係床邊望
天打卦。可能我動作大又嘈，男友終於頂我唔順起身換衫陪我一齊癲！大家要知道清晨五點多，在多倫多的冬天來說是天未光，又正好是剛剛下完雪！總感覺到這大風大雪之情況下出門，一定是去做一件很勁嘅事.....無聊事？！
真的出了門口，開車到就近的牡丹樓，佢竟然重未開門。天啊，要在停車場呆等一個小時到六時才等到佢開舖。人多好辦事，我那二十分聰明嘅前男友就問我＂係唔係好想？＂，我不斷點頭。前男友又再開車。由於加國民族性極懶，我實在摸不着前男友之鬼主意，天又未光，一間唔開，差不多代表所有都唔會開門。車子一路開，開進了高速公路上。又開了差不多半個小時，我終於忍不住再問我哋嘅目的地。男友當時嘅答案令十數年後，我再想起也是會回心微笑。佢當時話＂我都唔知道去邊度，總之揸車去不同的高速公路嘅加油站，總有一個有你要嘅牡丹樓＂。聽完佢嘅答案，當下果然係好冧。最後大約再過咗半個鐘都無我要嘅牡丹樓，最後我決定去到下一個加油站後停車，無論佢係唔係牡丹樓都唔緊要了。因為嗰一刻，食乜都已經唔重要，重要嘅係男友嘅愛護，果然係一個很美好嘅回憶，值得！.....或者識得我耐及一齊在加國成長嘅朋友們，都應該知道我講緊邊個！
開呢個 Post， 其實重點係想講我嗰病，今早又發作。今次嘅解藥係朱古力。凌晨五點，我忍唔住去客廳搵解藥- 朱古力。朱古力就搵晤到，返轉成個客廳都只係搵到一罐樂家杏仁糖。好過乜都無，一手拿了四粒拍落口。個人直頭安樂曬！即刻返上床訓覺覺豬。
Craving 一字在我來說係一種病，有如頭暈身興一樣，只要藥到馬上便病除。